الجريـف و اللوبيـا

عندي شوق لي نيلنا
والأهل والطيبة
الجريف واللوبيا
وباقي ذكرى حبيبة
وغشة الصفصاف
القايمة عاملة زريبة
ضل مغطى القيفه
فوقو روعة عجيبة

يا سواقي بلدنا
وينو صوتك مالو
وينو قارع موجتك
غنى باسم حالــــــــــــــــو
وين غسيل النيل
و شر هدوم فى رمالو
وينو ماضى الحله
وين ومين الشالو


كان زمان ندلى
لما كنا صغار
من فريع لفريع
نقطع الإثمار
كان بحرنا نعوم
ناس صغار و كبار
فينا طيبة القرية
ومافى كان أسرار

وينو صوت الساقية
الكان يشق الليل
وين نخيلنا الرامي
الظلال في النيل
وين وين دفيقا
الكنا منه نشيل
وين جداول الموية
الجارية زى السيل

يا بحر حلتنا
في رمالك ذكرى
لابتشيل الموجه
ولا بتفارق الفكرة
الجريـف و اللوبيـا