منقول: د .الفاتح جبرا بين السخرية والسع بالكلمات واللكمات

قام (الطريفى) بإعطاء الروشتة إلى الصيدلى وشرح الأمر له وسرعان ما قام الأخير بإحضار (الدواء) من (الرف) القريب منه وإعطائه للطريفى الذى غادر الصيدلية متوجهاً لمنزله الذى عاد له منهك القوى من فرط المشاوير (الكتيرة) حيث تهاوى إلى أقرب سرير
- أجيب ليك العشاء
- لا..لا خليهو شوية أنا تعبان شوية وعاوز آخد ليا نومة (خفيفة)
ما أن وضع (الطريفى) رأسه على (المخدة) حتى رأى فيما يرى النائم أنه داخل قفص حديدى ضخم تحيط به (الأفاعى) و(الثعابين) و(العقارب) من كل ناحية وصوت جهورى (خشن) يناديه:
- يا الطريفييـيـيـيـيـي
- (فى خوف شديد وهو يرتعد) : أيوه فى شنو؟؟ أنا مالى؟؟ إنتو منو؟؟
- يا الطريفييـيـيـيـيـي
- (فى فزع ورعب وهو ينظر للثعابين) أيوا يا جماعة فى شنو؟؟ أنا الطريفى فى شنو؟؟ (ثم وهو يصرخ) يا جماعة شيلو منى (الثعابين) دى ونتفاهم
- ح نشيلا منك لكن بعد ما تلتزم لينا
- ألتزم ليكم بشنو؟؟
- إنت ما عاوز (بنتك) تتعالج وتبقى كويسة؟؟
- أيوه عاوزا تتعالج

طيب إلتزم لينا إنك من الليلة دى الناس الغلابة ديل ما تسألهم تانى وما تقطع رزقهم .. ما تشيل تانى عدة بتاعة (ست شاى) ولا (ميزان) بتاع (سيد دكان) ولا طبلية (فارش) فيها زول ... وكمان فى حاجة تانى
- حاجة شنو يا جماعة؟
- إنك تكون (عادل) والناس (المسئولين) الكبار العندهم (بيزنس) ديل وما قاعدين تسألوهم وتشيلوا منهم (الأتاوات والجبايات) المفروضة عليهم ديل تحاسبوهم على (داير المليم)
- (فى إستعباط) ذى منو؟؟؟
- إنت عارف .. ونحن عارفين ..(ثم الصوت مواصلاً) هسع الصيدلية الأشتريت منها دواء (بنتك) دى قاعد تمشى تشيل منهم (أتاوات والا جبايات) ؟؟
- لكن ما بقدر لـ ....
ومع كلمة (ما بقدر) كشرت جميع (الأفاعى) و(الثعابين) عن (أنيابها) وإتجهت نحوه مما جعله يصرخ صرخة داوية جاءت على إثرها (زوجته) مذعورة :
- سجم أمى مالك يا الطريفى بتصرخ؟؟
- لا لا مافى حاجة (ثم فى سره) اللهم أجعلو خير ... اللهم أجعلو خير ، لم يغمض للطريفى جفن تلك الليلة وهو يسترجع ذلك (الحلم) المرعب وتلك (الأفاعى) و(الثعابين) وهى تكشرعن (أنيابها) وتتجه نحوه
في صباح اليوم التالي إتجه (الطريفي) نحو مكتبه وهو يستصحب معه صور ومشاهد ذلك (الحلم) المرعب المزعج وحديث ذلك (الصوت) الذى خاطبه .
تناول (الطريفي) افطاره بالمكتب ثم قام بالبحث فى أدراجه عن تلك (القائمة) التى تحتوى على (بيزنس) وشركات ومحلات (المسئولين) والتى سلمها له (رئيسه المباشر) يوم أن تمت ترقيته كنائب مدير للتحصيل

قام الطريفى بوضع (القائمة) داخل (ملف) ، قام بإختيار فريق
التحصيل الذي سوف يرافقه (فى هذه المهمة غير العادية) من موظفين وقوة مدججة بالسلاح وقام بركوب البوكس (الهايلوكس) .
دخل الطريفي إلى (صيدلية المسؤول) ثم اتجه وهو يحمل بعض الدفاتر في يده صوب أحد الصيادلة قائلاً:
- بالله لو سمحت أنتو مما عملتو الصيدلية دي ما دفعتو (أتاوه والا جباية) وما عندكم ملف عندنا فى (الديوان) ، عليكم مية وخمسين مليون وستمائة وخمسين ألف جنيه، ممكن تدفعوها لينا هسي؟!.
- (الصيدلي في هدوء): معليش يا أخي بس صاحب الصيدلية ما موجود.
- ما عندو موبايل.. ما تتصل به؟!
- ايوه عندو بس..
- بس شنو لو ما دفعتوا هسع أنا ح أضطر أشيل (صف) الأدوية القدامي دا كلو وكمان معاهو كل الأجهزة الطبية دي
- (في اضطراب) لا .. لا اقيف دقيقة اتصل ليك بيهو(ثم مواصلاً) لكن انت عارفو منو؟!.
- يعني ح يكون منو؟! ما يكون زي ما يكون !!
- انت عارف طبعاً اسم الصيدلية دي شنو.
- ايوه عارف اسمها (صيدلية هناي) .. يعني شنو؟!.
- تفتكر سيدا يكون شغال شنو؟!
- إن شاء الله يكون (سكرتير الأمم المتحدة).. دا شغل.
تحت عدم انصياع (الطريفي) وتمسكه بـ (الدفع) أو أخذ كميات من (الأدوية) و(المعدات) الطبية (رهينة) قام الصيدلي بالاتصال بالمسؤول شارحاً له الأمر، فطلب المسؤول من الصيدلي أن يعطي (الموبايل) لموظف (الجبايات) ليتحث معه.
- ألو أنا المسؤول

وأنا الطريفي
يا (الطريفي) موضوع (الجباية) دا أنا اتكلمت فيهو مع الأخ المدير العام بتاعكم وكمان حا اكلموا دلوقت و...
- (الطريفي مقاطعاً): مع احترامي الشديد ليك يا سعادتو لكن دا شغل وأنحنا قاعدين كنا نشيل (الكبابي) و(الكفتيرات) من ستات الشاي، القدام الصيدلية، دي وكمان (الميزان) بتاع سيد الدكان المقابل للصيدلية دي و...
- (في حدة) بقول ليك خلاص أنا حا أشوف الموضوع دا مع المدير
العام بتاعك.
- والشلنا منهم الكبابي والمناقد والكفتيرات ديل يشوفوا الموضوع بتاعم مع منو؟!.
عندما أحس (المسؤول) بأن (الطريفي) ما براهو، قام بقفل (السكة) وقام بالاتصال على الفور بمدير عام (ديوان الأتاوات والجباية) الذي بعد أن فهم الموضوع اتصل على الطريفي في هاتفه الجوال وما هي إلا دقيقتان حتى رن جوال (الطريفي) وهو لا يزال في الصيدلية، أخرج الطريفي موبايله من جيبه ونظر إلى الرقم فوجده رقم المدير العام.
- نعم سعادتك..
- يا (الطريفي) أنا اتصل بي السيد المسؤول هسع وقال إنك هسع في الصيدلية بتاعتو وقلت ليهم يا يدفعوا يا حا تشيل حاجات رهائن.
- يا سعادتك حسب تعليماتك أنو أي زول عليهو أى (جبايات) ما دفعا نشيلا منو ولو رفض أو ما دفع نعمل ليهو ناخد منو حاجات (رهائن) وهسع أنحنا ستات الشاي ما قاعدين نخليهم، بتاعين الطبالي ما قاعدين نخليهم ، وبرضو بتاعين الدكاكين
- يا الطريفي موضوع الصيدلية دا خليهو لي.
- (في حسم) ما بخليهو.
- (في غضب وقد تفاجأ) قلت شنو؟!
- قلت ليك ما بخليهو.. وزي ما القانون مشى على الناس الغلابة ديل يمشي على أي زول.
- (فى لهجه آمرة) يا موظف سيب الموقع دا هسع وتعال المكتب.
- والله لو ما (قفلتها) ما بجي
هنا وجد (المدير العام) نفسه في ورطة كبيرة، فهو قد طمأن سيادة المسؤول بأن الأمر منتهي وأنه سوف يقوم بأمر (الموظف) الطريفي بغض النظر عن المسألة، فماذا سيقول لسيادته لو أن (الطريفي) ركب راسو وقام بقفل الصيدلية، ووضع (الطبل والأقفال) على أبوابها (الأربعة) وأخذ الأدوية والأجهزة والمعدات كرهائن.
رفع (المدير العام) سماعة التلفون واتصل بمدير التحصيل (الرئيس المباشر للطريفى)
- شوف يا (عبدالرحمن) أنا عاوزك تمشي هسع (صيدلية هناي) القدام (طلمبة البنزين) دى وتجيب لي الموظف بتاعك الاسمو الطريفي دا هسع.
- مالو سعادتك؟؟
- دا عاوز يقفل الصيدلية ويشيل (حاجات) رهائن عشان الصيدلية مما عملوها ما دفعت (الجبايات) العليها.
- لا والله يا سعادتك ما عندو (حق) أنا هسع ح أكلم (عبدالباقي) يمشي يجيبو.
ما تكلم لا (عبدالباقي) لا (عبدالسميع) تمشي انت هسع بي نفسك تجيبو وتجي (ثم مواصلاً) أنا اودي وشي وين من المسؤول؟

قام (عبدالرحمن) مدير التحصيل ومعه مساعده (عبدالباقي) بركوب البوكس والذهاب إلى الصيدلية وعندما توقف البوكس أمام الصيدلية، كان الطريفي ومعه القوة التي معه يقومون برفع كميات من الأدوية والأجهزة الطبية على (البوكس).
- دا شنو يا الطريفي البتعمل فيهو دا؟
- شنو ما قاعد اشتغل..
- (مخاطبا العمال) اقيفوا يا جماعة خلاص وقفوا ما تشيلوا حاجة تاني.
- (الطريفي يأمر العمال ) ما تقيفوا شيلو الحاجات القلتها ليكم كلها ارفعوها في البوكس.
- انت يا الطريفي جنيت؟!
- ما جنيت لكن قاعد انفذ في تعليماتك وأنت رئيسي.
- طيب هسع تعليمات جديدة خلي الصيدلية دي وارجع المكتب.
- أنا شغال بالقانون وما قاعد أعمل حاجة من عندى
تجمهر (الباعة) و(المارة) وأصحاب المحلات ... توقف بعض أفراد القوة عن نقل الأدوية والمعدات تنفيذاً لأوامر (سيد عبدالرحمن) بعضهم كان لا يزال يقوم بنقل الأشياء ... (الصيادلة) وقفوا خارج الصيدلية وهم غير مصدقين لما يحدث ..
- أها يا (عبدالرحمن) خلاص انتهيتو من الموضوع؟!
- والله يا سعادة المدير العام (الطريفي) دا راكب راسو ورفض يسمع كلامي وهسع (مشيل) ليهو (شاحنتين) أدوية وقاعد يملا في بوكس تاني معدات وأجهزة طبية.
- (في غضب) جيبو لي هسع، ووقف المهزلة دي، أنا المسؤول اتصل علي هسع وقلت ليهو الموضوع انتهى.
- يا سعادتك والله أنا ما قدرت عليهو هو موظف وعندو سلطات قاعد يمارس فيها.
- (فى غضب شديد) اديني ليهو
- شوف يا الطريفي أنت مفصول.. مفصووووووووووووول
- عرفناكم قاعدين تشيلو الناس (الصالح العام) كمان تشيلوهم وهم في (الشارع العام) - ثم في حدة - لمن أجي (المكتب) هناك أفصلني.
- الطريفي أنت مفصول ورجع حاجات الصيدلية دي.
- وأنحنا كنا (المساكين) ديل قاعدين نرجع ليهم حاجاتهم.
- (في وعيد وتهديد) طيب أنا ح اوريك.
ما أن وضع (المدير العام) سماعة التلفون حتى اتصل به سعادة المسؤول

أها الموضوع خلاص انتهى؟!
- نعم سعادتك الموضوع خلاص انتهى والحمد لله
- لكن هسع دكتور (معاوية) اتصل علي من (الصيدلية) وقال لي الموظف بتاعكم راكب راسو.
- لا.. الطريفي دا أنا هسع (فصلتوا) بالتلفون.. وكلفت مدير التحصيل (عبدالرحمن) ومساعدو (عبدالباقى) انو ينهوا المسألة.
- لا عال.. شكراً.
فى محاولة للخروج من هذه (الورطة) قام (المدير العام) من
كرسيه (الدوار) ..ارتدى (بدلته) في سرعة وطلب من سائقه التوجه به إلى (صيدلية هناي).. توقفت العربة الهمر (المظللة) أمام الصيدلية والتي تجمهر أمامها خلق كثير، قام المدير العام بفج الحشود حتى وصل إلى حيث توجد (الشاحنات) التى إستأجرها (الطريفى) خصيصاً وقد قاربت على الإمتلاء بينما كانت هناك مشادة بين (الطريفي) من جهة و(عبدالرحمن وعبدالباقى) من جهه أخرى لكنهما ما أن قاما برؤية (المدير العام) حتى هرولا نحوه :
- والله يا سعادتك (الطريفي) دا لا عاوز يسمع كلامنا لا عاوز يسمع كلامك ويخلي الموضوع دا.
- قام (المدير العام) باصطحاب (الطريفي) بعيداً عن الجمهور بعد أن قرأ على وجهه علامات التمادي في تصرفه.
- يا (الطريفي) يا أخي ما تحرجني موضوع الصيدلية دا خليهو، والسيد المسؤول اتصل علي هسع وقال ح يدفع العليهو كلو.
- انت مش قلت لي هسع في التلفون اني مفصول؟!
- يا الطريفي أنا (بهظر) معاك ساكت .. معقول موظف يفصلوهو بالتلفون؟!
- والله انتو تفصلوا الزول (بالانترنت)
- يا الطريفي استهدى بالله وما تخليني اتصرف معاك تصرف ما كويس
- تصرف ما كويس ؟؟ أنا موظف دولة وقاعد أؤدي في عملي، بعدين لمن ارجع المكتب افصلوني
قال الطريفي حديثه ذلك واتجه نحو (الشاحنة) الأخيرة التي كان قد تم (تستيفها) بالأدوية والمعدات الطبية ثم أدخل يده فى (تابلوه) البوكس وأخرج عدداً من (الطبل والأقفال) التى أخذ يلوح بها للجماهير المحتشدة والتي علمت بما يجري فأخذت في الهتاف :
شيلو (الحـقن) شيلو (الشاش)

دا القـــانون والا بلاش
شالت الهاشمية الطريفي فطلع على ظهر البوكس وأخذ يلوح بـ (الطبل) للجماهير، ثم في نشوته تلك ارتجل كلمة مخاطباً بها الجماهير.
يا جماهير الشعب (الفضل) ويا تجار السوق الجديد، ويا أصحاب المهن الهامشية، هذه الصيدلية التي ترونها امامكم لم يقم صاحبها بدفع (الجباية) منذ أن افتتحت قبل عشر سنوات، اتدرون كم هي (الجباية) التي قدرت عليها؟!، خمسمائة مليون جنيه، اتدرون لماذا لم يسألها أحد طيلة هذه السنوات؟! لأن مالكها مسؤول كبير... نعم إن محال وشركات ومصانع المسؤولين لا تسأل عن أى نوع من الرسوم أو الجبايات أو التراخيص لكنكم تسألون، انتم أيها الضعفاء الفقراء المساكين.. يا أصحاب المهن التي لا تدر لكم إلا قوت يومكم بالكاد.
الآن سوف نقوم بقفل هذه الصيدلية حتى تمشى (الثعابين) أقصد القوانين على الكبير والصغير، ثم قام بوضع الطبل على كل الأبواب بينما كان (عبدالرحمن) و(عبدالباقي) يناشدانه في ضعف
- يا الطريفي عليك الله خلي الموضوع دا.. ياخي المدير العام دا المسؤول ح يشيلو..
ركب الطريفي في البوكس وأشار إلى بقية (الشاحنات) بالانطلاق نحو مبنى ديوان (الأتاوات والجباية العامة) تحت هتاف الجماهير المحتشدة:
بعد أشهر قلائل كانت (التومة) ست الشاي تقوم باحضار كباية شاي لدكتور (معاوية) في الصيدلية وفي طريقها اشتمت رائحة (طعمية كاربة)، فذهبت لتشتري لها (ساندوتشا) ... كان وجه البائع وهو يقوم بوضع (الطعمية) على (الصاج) مألوفاً لديها، حاولت أن تتذكر أين رأت وجه ذلك الشخص..... ما لبثت أن تذكرت
- هى ده ما (الطريفي) بتاع (الكشة

لعدم كفاية الأدلة

--------------------------------------------------------------------------------

تحت شجرة النيم الوارفه ذات الظل الممتد التى تقع أمام منزل (حاج مختار) إنعقد المجلس اليومى لشلة (الضمنه) والذى يضم اللاعبين الاساسيين (حاج سليمان النجار) والذى يقع منزلة ملاصقاً لمنزل (حاج مختار) من الجهه اليمنى و(أبو زيد الحلاق) وهو الجار الملاصق لحاج مختار من اليسار و(عم سيدأحمد) المعلم بالمعاش والذى يواجه منزله منزل (حاج مختار) ... على الرغم من أن (حاج مختار) كان يدعى انه (أحرف) من لعب (الضمنه) غير أنه فى ذلك اليوم كان كثير الأخطاء مما جعل زميله فى اللعب (أبوزيد الحلاق) يهاجمه بعد أن مات (الدش) فى يده قائلاً :
- والله (يا حاج مختار) على بالحرام إنت خرفت وبقيت ما بتركز !!
- أركز كيفن عاد وأنا الليل كلو ما نايم !!
- (أب زيد فى تريقه) : بتحب وإلا شنو؟
- احب شنو والله يا جماعه أنا ليا كم يوم (حبوب النوم) القاعد أخدن ديل قطعوا منى
و...
- (حاج سليمان مقاطعاً وهو يقوم بإمساك قطع الضمنه بكلتا يديه) : وما تمشى تشتريهن من
لأجزخانه؟
- (حبوب النوم دى يا (حاج سايمان) ناس الجزخانه ما بصرفوهن لى بدون روشته من الدكتور
- (أستاذ سيد أحمد وهو يضرب بقطعه الضمنه على التربيزة) : وما تمشى للدكتور يكتبا ليك
- (حاج مختار يضع قطع الضمنه على التربيزه كمن يوقف اللعب) : ده ما الموضوع يا جماعه !!
- (الجميع فى إستغراب) : طيب أها والموضوع شنو؟
- (يقوم حاج مختار بجر كرسيه أإلى الأمام قليلا كمن يود أن يذيع سراً) : أصلو الحكايه انا
مما (حبوب النوم) ديل قطعن منى بقيت ما بجينى نوم إلا مع آذان الصبح
- (الجميع بصوت واحد) : أها وبعدين
- بعدين يا جماعه كل يوم الساعه إتنين بالليل أسمع ليك صوت عربية (تربط) قدام بيت جارنا
الجديد (حاج رمضان) ده !!
- عربيت شنو؟

(بوكس هايلوكس) ليهو اسبوع يجى الساعه إتنين ويقيف قدام بيت (حاج رمضان) الأجرو ده
ويطلع ليهو (حاج رمضان) ويبدأ يطلع فى (طباقت البيض) والسواق سيد البوكسى (يرص) والله
أكان قلت ليكم كل يوم قاعد يمرق ليهو ميت طبق شويه !! يستف ليك البوكسى ده لى عينو
ويقوم فى النهاية ( سيد البوكسى) يدور ويمشى و(حاج رمضان) يدخل بيتو ويسدو عليهو !!
- ما إحتمال يكون وادينو لى مناسبه وإلا كده
- مناسبت شنو بقول ليك الكلام ده مستمر كل يوم ليهو يجى أسبوعين
- والبيض ده بجيبو من وين عندو مزرعه ؟ وإلا مربى ليهو جداد فى البيت
- جداد شنو؟ وبيت شنو؟ البيض ده (كتير خلاص) ما بيضن بتاع (جداد بيت)
- أها يعنى كل يوم بجيبو من وين؟
- (حاج مختار مخاطبا الشله) : والله يا جماعه ده المحيرنى ذاتو - ثم يلتفت نحو (حاج
سليمان) – كدى بالله يا سليمان لاحظو للحاجه دى !!

إتفقت شلة الضمنة التى تجلس أمام منزل (حاج مختار) على مراقبة (حاج رمضان) لمعرفة سر (أطباق البيض) التى تخرج من المنزل ليلاً وعلى مشارف الصباح وفى ذات الوقت المحدد وعند الساعة الثانية بعد منتصف الليل تماما كان الجميع يواربون أبواب منازلهم وينظرون من فتحات (الشبابيك) إلى (حاج رمضان) وهو يقوم بملئ (ضهرية البوكس) بأطباق البيض !!
- أها شفتو كلامى صاح وإلا ما صاح ؟
قالها (حاج مختار) وهو يقوم بتعديل وضع البنبر ليواجه زميله فى اللعب (أب زيد الحلاق) بينما تتوسطهما (تربيزة الضمنه)
- والله فعلا الكلام القلتو طلع صاح أنا أمبارح ساهرت لمن البوكسى جا
- أنا ذاتى شفت المنظر ده أمبارح (قالها الطاهر) جار (حاج رمضان) من الناحية الأخرى
- (الطاهر مواصلاً) : شوفو أنا بعد شوية ح أجيب ليكم خبر القصة دى
- أعمل حسابك الزول ده ما قاعد يتكلم ليهو مع زول مما جاء سكن فى الحى ده
- لا أنا عندى ليهو خطه بت لذينا

- خطت شنو؟
- أنا ح أمشى أعمل ليهو إنى عاوز ليا (طبق بيض) وفتشت الدكاكين كلها ما لقيت !!
قام (الطاهر) فورا من مقعده متجها نحو (باب) حاج رمضان وبعد طرقات بسيطه فتح الباب بينما كان أفراد (الشله) ينظرون بطرف أعينهم لما يحدث .. لم يطل إنتظارهم حتى خرج (الطاهر) من منزل (حاج رمضان) متجها نحوهم وهو خالى الوفاض لا يحمل فلى يده شيئا بينما كان الجميع فى إنتظاره لمعرفة ما أسفرت عنه زيارته لحاج رمضان
- أها حصل شنو؟
- (وهو يجلس على البنبر من جديد) : والله الراجل رحب بيا وقعدنى فى الصالون بتاعو .. قلت ليهو أنا مستعجل وعاوز ليا (طبق طبقين بيض ) لأنى ما لقيت فى الدكاكين .. قام قال ليا (لكن أنا ما عندى جداد) قمت سكتا وما قدرت أقول ليهو (البيض القاعد تطلعو بالليل ده شنو؟)
لما كان (الطاهر) يقص ما حدث كان (أزهرى) والذى يعمل سائقا بأحد الجهات (الأمنية) قد إنضم (للشلة) فى الفترة التى ذهب فيها (الطاهر لزيارة حاج رمضان) وعرف بموضوع (أطباق البيض)
- أنا الموضوع ده ح أجيب ليكم خبرو بس إنتو روقو شويه !

قالها (ازهرى) فى نبرة (رجل الأمن الواثق من نفسه) ... لم يضع (أزهرى) أى وقت ففى صبيحه اليوم التالى قام بإخطار الشخص المسئول أمنيا عن المنطقة التى يسكنها (حاج رمضان) بأمر (البيض) وفى سرعه تم تكوين تيم لمراقبة المنزل حيث جاء التقرير بعد ثلاثة أيام يفيد بأن هنالك كميات من (البيض) الموضوع على (أطباق) تخرج فى تمام الساعة الثانية من بعد منتصف اللبل كل يوم من منزل المدعو (حاج رمضان) كما إنه قد إتضح من خلال و-(المراقبه والتنصت) بأن المنزل لا يحتوى على أى نوع من أنواع (الطيور) أو الحيوانات

بلا كلام فارغ !

فى خبر نقلته وكالات الأنباء العالمية فى يوم 18/9/2008م أى قبل أسابيع قليلة أن وزير الزراعة الياباني (سيشي أوتا) قد قام بتقديم استقالته بسبب وجود (أرز) مصاب بالفطريات بالأسواق مما جعله غير صالح للإستهلاك الآدمى وأوضح (أوتا) أنه بهذه الإستقالة فإنه يقوم بتوضيح مسئولية وزارته عن ذلك رغم أنه لم ترد تقارير حول ظهور حالات إصابة بأمراض بسبب استهلاك الأرز الملوث.


إنتهى الخبر والذى ما أن إنتهيت من قراءته حتى قلت لنفسى : أيه الكلام الفارغ والدلع بتاع (اليابانيين) ده ؟ عشان (رز) فيهو شويت فطريات (وزير) يستقيل؟ وكمان مفيش حد (مات) وإلا (إتسمم) وإلا جاتو حاجه؟ إذاى يستقيل (اليابانى العوير ده)؟ هو كان جاب الرز ده من بيت أبوهو؟ وشنو يعنى (فطريات) ما أهو نحنا لينا زمن قاعدين نشرب (مويه بالفطريات) وبالطحالب وبالما بعرف شنو داك .. حصل أيه يعنى؟ قال أيه (رغم أنه لم ترد تقارير حول ظهور حالات إصابة بأمراض بسبب استهلاك الأرز الملوث) يعنى مفيش حد مات ! والله ده شئ عجيب ما ممكن يحصل طبعا فى (بلدنا) لأنو نحنا معندناش الكلام الفارغ والدلع ده علشان كل مسئول عندنا (قوى وأمين) وجلدو (تخين) يموتو عشرة يموتو عشرين يموتو مية مش مشكلة .. طيارات تقع (زى الرز) .. عمارات تنهار (نص النهار) .. الخريف يجى (فجأتن) ويموت من يموت (بالسيول والأمطار) وتمتلئ البرك والحفر والمستنقعات وتنتشر الأسهالات والملاريات … وتمتلئ الأرفف بالأدوية (منتهية الصلاحية) ويأتى الصيف (فجأتن) – منذ عشرات السنين- ويضعف الإمداد الكهربائى وتقطع الكهرباء … عاوزين المسئولين يقدموا إستقالاتهم عشان الحاجات البسيطة دى ؟ ! ده يبقى (سخف) زى (السخف) بتاع (الكيان الصهيونى) الذى إتهمت (شرطته) مؤخراً رئيس وزرائه (الإسرائيلي) إيهود أولمرت ، بتهمة (الفساد المالى) قال أيه فى رجل أعمال أميركي إسمو (موريس تالانسكي)، جمع ليهو حوالى (مائة ألف دولار) – يعنى حوالى ميتين مليون جنيه بالقديم- عشان يدعم بيهم الحملتين الانتخابيتين اللتين خاضهما أولمرت للوصول إلى بلدية القدس في عامي 1993-1998، وكمان لحملته الانتخابية الفاشلة لزعامة حزب الليكود عام 1992، وانتخابات داخلية تانيه الحزب عام 2002 ، وعشان الإتهام ده قام (أولمرت) بتقديم إستقالته من منصبه كرئيس للوزراء ورئيس للحزب (كمان) !
بالله شوفوا السخف الصهيونى ده؟ أول حاجه القروش موضوع (التهمة) دى ما تشترى ليها بيت جالوص فى (أم جلافيط) ! وتانى حاجه ليست من (بيت مال الصهاينة) كما إنها ليست (كومشن) لإرساء (العطاء) الفلانى للشركة (الفلتكانية) بل هى مبالغ تم جمعها (خلال 15 سنة) كتبرعات لدعم حملات (أولمرت) الإنتخابية !
أيه السخف ده (شرطة) تحقق مع (رئيس وزراء) عشان واحد بلدياتو ومن حزبو قاعد فى (أمريكا) جمع ليهو (ميتين مليون جنيه بالقديم) يساعدو بيها فى حملتو الإنتخابية ؟ ومش كده وبس و(رئيس الوزراء ) يقدم إستقالتو من (رئاسة الوزارة) ومن (رئاسة) الحزب كمان ؟ ده يبقى إسمو (دلع) ؟ ده كلام برضو؟ نحنا معندناش كلام فارغ ذى ده .. يعنى لما كل وزير أو مسئول عندنا يقدم أستقالتو حنجيب وزراء ومسئولين من وين؟ هو نحنا عندنا ناس (تفتيحه) وعباقرة زيهم؟ هم كم واحد (الحيلتنا) نشيلهم من الوزارة دى نختهم فى الوزارة دى .. يلا .. بلا (إستراحات) بلا (استقالات) بلا كلام فارغ !